إتزينى
وسكّى البيبان
لحظة لقاه
كل الأمانى إتحققت
نظرة عنيه.... لمسة إيديه
ضمة شفايفه ع الحنان اللى ف عيونك
لونى رمشك لون الحياه
مدى خطاوى البال لوح
مرسوم عليها رغبتك
تحتارى بين ألوان كتير
توب الفرح
لازم يكون فاضح لكل المسأله
ساتر عيوب مش ف الجسد
لامع ولا نجمة سما
جايز بريقها يخطفه
وتفوت ساعات... وبتسرحى
إزاى اغازل دا البسيط
يتصور العالم محيط م الأسئله
فتتوه سفينة فطرته
ويبات غريق
إتخيلي...واقف على الباب
ينادى ع الضميرلحظة قرار
وامّا يطول الإنتظار
ويعدى ليلك
يطوى معاه حلم النهار
منيتى روحك بالشروق اللى ف عنيه
تكتشفى إنك
ماندهتهوش
عبد الرحمن الخطيب
